Hesabo şaş, Efrîn ra ageyreno

XOSER WELAT

Hikumatê AKP û Erdoganî bi şerê verva Efrînî, xeyal û hesabê zaf pîlîy kerdbîy. Bi goreyê hesabê Erdoganî û dormeyê ey, hîrê saetî ra heta hîrê rocîy do Efrîn îşgal bikerdêne. Bi nêy serkewtişî zî do kaoso ke seba lûmitişê kirinanê xo êy qilêrinan awan kerdbi ra, bixelesîyayêne. 

La ze ke bi cerebnayişanê merdimayîye ameyo teqezkerdene, hesabê keye û bazarî her wext yewbînîy nêgeno û hesabo şaş zê fatûreyêke giranî ro wayîran agêreno. No qeîdeyo civatî dorêka bîne di şexsê Erdoganî û polîtîkayanê ci de teqez bi. Hesabê Erdoganî û faşîzmê ey ê bazarî zî yewbînîy nêgirot û zê fatûreyêkê giranî, Efrîn ra agêreno. Nika wina eyseno ke Edogan û dîktatorîya ey, bi panc qurûşî kewtê ci û bi des qurûşî nêşikenê, ci ra bivecîyê.

Gelo çi ra Erdoganî û dormeyê ey hesabêko wina şaş kerd?

Yew, Erdoganî û dormeyê ey bi qaso ke di heme tarîxê komare de nêbîyo, dizdî û bêrayîtîyê bazirganî û aborî kerdbîy. Reyna Erdoganî û dormeyê xo, di Kurdistan de sûcê verva merdimayîye pêk ardbîy. Bi kerdenanê xo yê antî demokratîkan di qada mîyannetewî de, bibi pereyêke. Bi zewtanê xo yê verva Îsraîl, Rûsya, Emerîka, dewletanê Ewropa û dime ra zî bi listişê tifê xo, tu îtîbarêkê ey, nê zerre û nê zî teber de nêmendbi. Erdoganî û dormeyê ey rê rayirêka ercane ya na bêîtîbarîye ra vecîyayişî, hewce kerdê.

Reyna xeyalê Erdoganî êy împaratorîya Rochelatê Mîyanênî, est bîy. Erdoganî waştê bibo xelîfeyê alemê îslamî. Rewşa dewletê Ereban orte de bî. Dewleta tirke qasêke bi cuwîyeyê xo yê civatî înan ra avere bî. Eke di şerrê verva kurdan de biser bikewtêne, do bi dayişê berrtîl û îhaleyan welatê Ewropa û dewletê bînî êy dinya zî, îqna bikerdêne.

Ya didiyine zî, Efrîn bajarêke bi û verva artêş û hêza hewayî ya dewleta tirke, loqêko zafîrî qic û di keys de bi. Çîyêko bîn zî êy ke oca cuwîyayêne kurdîy bîy. Heman çîy di Sûr, Nisêbîn, Şirnex û xeylê bajaranê kurdan de pêk ardbîy. Îtîya de zî bi artêşe û hêza xo ya hewayî ke di NATO de zê artêşa didiyine ameyê binamekerdiş, do hîrê rocîy de Efrîn îşgal bikerdêne û bi propogandaya çapemenîya xo zî bibîyêne fatîhê Rochelatê Mîyanênî. 

Ya hîrine û tewir muhîme zî hesabê hêzanê hegemonîkan êy dinya û fîtkerdişê înan bi. Di Rochelato Mîyanên de hêzêka newîye ya bi paradîgmayêka newî, xobawer û qerardare ya kurdan vecîyabî orte. Bi paradîgmaya aştî û biratîya şar, qewm û reng û vengê cîyayan ro hesabê hêzê hegemonîkan êy dinya nîyameyêne. Gere bi awayêke kurdîy na paradîgmaye ra biameyêne aqitnayîş û bi goreyê hesaabê înan têbigeyrayêne. Yanê mecbûrê înan bibayêne. Heke na pêk nîyamî û Erdogan bi ser nêkewt, na dore zî do Erdogan bi goreyê xo dîzayn bikerdêne. Her didi îhtîmalîy zî seba hêzê hegemonîkan kêr ameyey bîy. Seba naye zî çimê xo êrîşanê Erdoganî rê girotîy.

La hesab şaş vecîya. Efrîn seba Erdoganî bi fatûreyêko giran. Hesabê hêzê hegemonîkan zî nêgirot. Ameyê texmînkerdiş ke bi êrîşê şewa 20’ê Çeleye ya 72 teyareyan, xo ra kes Efrîn de nêmendê û heme koçber bîyê. Hêzê lejvanîy zî orte de mendê û hewarê xo berdê hêzê hegemonîkan rê.

Her çende hêzê hegemonîkan zanayê ke kurdêy newey loqêko qic û rihet nîyê zî la reyna cerebnayişî ra zirarêkê înan çinê bi. 

Ewro roca 24’ine ya “Xoverdêrîya Seserre ya Efrînî” ya. Lejvanê kurdan û şarê Efrînî, bi xoverdêrîyêka tarîxî, dersan danê Dewleta Tirke. Êdî heme dinya vînena ke kurdîy alternatîfê cuwîyeyê neweyî êy Rochelatê Mîyanênî û dinyaya newîye yê.